Sunday, April 3, 2011

ရက်တရက်၏ နာရီစက်ဝန်း

မိုးသောက်နံနက်၊ အာရုဏ်တက်မှ
ညဥ့်နက်သန်းခေါင်၊ ရောင်နီလင်းဖြာ
နာရီစက်ဝန်း၊ လည်ပတ်ယွန်းလျက်
ထိုတရက်တွင်၊ သင်တို့ ငါတို့ 
ဘာလုပ်နေကြပါသနည်း...။
*
စီးပွားဥစ္စာ၊ ဘာဝနာနှင့်
ဒါနအလှူ၊ ပညာယူလျက်
အကျိုးသက်ရောက်ခဲ့သလော...။
*
ကိုယ့်ရပ်ကိုယ့်ရွာ၊ ကိုယ့်ပြည်သာဖို့ 
သာမှုနာမှု၊ ပြုပါ၏လော...။
*
သောက်စားမြူးထူး၊ အပျော်ကြူးလျက်
ရူးမူးလျှောက်လည်နေသလော...။
*
အတင်းအဖျင်း၊ လေကြောခင်းကာ
ငြင်းခုံဝေဖန်နေသလော...။
*
တွေဝေငေးမော အပျင်းတောဝယ်
ကျောခင်းလဲလျောင်း နေသလော...။
*
အချိန်ဟူကား၊ ရွေ့ ရွေ့ သွားလျက်
အစားထိုးမရ၊ ကုန်ဆုံးရ၏
တွေးဆမျှော်လျက်၊ ထိုတရက်၌
ကျိုးသက်ရောက်၏၊ ရှိမရှိကို
အသိချိန်ချင့်
ဆန်းစစ်သင့်ပြီလေတကား...။။။
*****
မေဃမင်းသူရိန်


(ဝတီကြေးမုံဘလော့မှ) 

အတ္တရေအိုင်ခွက်ထဲမှ ရုန်းထွက်ခြင်း

ရခိုင်သား ... အနောက်သား
ချောင်းသား ... ရမ်းဗြဲသား
ခွဲခြားသတ်မှတ် ... နေတတ်ခဲ့ငါ...။
*
အ၀ကျွန်းသား ... မာန်အောင်သား
မြောက်ပိုင်းသား ... တောင်ပိုင်းသား
ဘောင်ခြားသတ်မှတ် ... နေတတ်ခဲ့ငါ...။
*
သမိုင်းစဉ်လာ ... ကိုယ့်ရိုးရာကို
ဖွေရှာဆန်းစစ် ... လေ့လာဖြစ်တော့
သွေးစစ်မျိုးရင်း ... အူတုံဆင်းတို့ 
အချင်းချင်းမြင်မှား ... တစိမ်းသားလို
ခွဲခြားနိမ့်ချ ... သုံးမကျသည့်
အတ္တသဲသဲ ... မာန်ကဲကဲနှင့်
အိုင်ထဲမှဖားငယ် ... မြင်မကျယ်သို့ 
'နယ်မြေ' ' ပြောမှု ' အကြောင်းပြု၍
မျိုးစုပိုင်းခြား ... မှားကြီးမှားမှန်း
ပြတ်သားတွေးဆ ... အသိရခဲ့...။
*
နာမမွှေးကြိုင် ... ပြည်မဏ္ဍိုင်မှာ
ရခိုင်သား ... ရမ်းဗြဲသား ... မခွဲခြားတော့...။
အ၀ကျွန်းသား ... ချောင်းသား ... မခွဲခြားတော့...
နောက်သား ... မာန်အောင်သား ... ဘောင်မခြားတော့...
မြောက်ပိုင်းသား ... တောင်ပိုင်းသား ... ဘောင်မခြားတော့ ...
*
ပြည်သားပီပီ ... လေးဝတီမှ
ညီနောင်အများ ... ကိုယ့်သွေးသားကို
ခွဲခြားသတ်မှတ် ... မနေအပ်တော့
ရှက်တတ်လာသည့်ငါ....။။။။
*****
ခိုင်လင်းမောင် ( ပန်းမြိုင်လယ် )

(ဝတီကြေးမုံဘလော့မှ)

ရခိုင်သဇင်မြေ

ရခိုင်ဒေသ၊ ကျော်ကြားလှသည့်
ရိုးမတံတိုင်း၊ အပြိုင်းပြိုင်းနှင့်
ရှုတိုင်းသာယာ၊ ရေဇလာသည်
ဖြူပြာလှိုင်းကြွ၊ တဖြဖြ ။
*
ရခိုင်ဒေသ၊ ရှုတိုင်းလှသည့်
မြစ်မလေးသွယ်၊ မြစ်ငယ်ပေါင်းဆက်
တိုးတက်ဖြိုးစည်၊ ကျွန်းပတ်လည်၌
ဖြစ်တည်ဝေဖြော၊ မြလယ်ယာတို့ 
ပြည်ရွာနှံ့ ထွေ ဘဏ္ဍာငွေ ။
*
ရခိုင်ဒေသ၊ သာယာလှသည့်
စိမ်းမြမြသွင်၊ သန့် စင်ကြည်လွန်း
လခြမ်းထင်ပေါ်၊ ပင်လယ်အော်သည်
ဖော်ကျူးသာစွ၊ ဂုဏ်ပြည့်ဝ ။
*
ရခိုင်ဒေသ၊ ဖော်ရွေကြသည့်
ရွှင်ပျဆီးကြို၊ သဒ္စါပို၍
ရွှေအိုဘုရား၊ စေတီများနှင့်
ထူးခြားဆန်းကြယ်၊ အံ့ဖွယ်တည်ရာ
သာသနာမြတ်၊ ထွန်းတောက်လတ်သည့်
ရှေးခေတ်သက်သေ သဇင်မြေ.....။။။
*
ထက်အောင်လင်း

အလွမ်းသစ်ပင်

သူ့ ဘ၀သည်
စိမ်းမြစိုလန်း နုပျိုဆန်း၍
ခက်ပန်းဝေေ၀ သီးလှိုင်စွေခိုက်
( ခွန် )ခွန်းချွေငှက်ကျေး သံစုံတေးနှင့်
သီကြွေးပျော်စံ သူ့ သဏ္ဍာန်ကား
ပြုံးဟန်ရောစွက် ပီတိဖက်၏။ *
ခရီးသွားလာ သူများစွာလည်း
ခက်ဖြာအေးရိပ် ပန်းဖြေအိပ်ရင်း
ချွေးသိပ်ခိုနား သီးချိုစားကာ
သူ့ အား အမွှမ်းတင်ခဲ့သည်။
*
လေပြင်းရိုက်ချက် ၀ဲဂယက်ကြောင့်
ခက်လက်ပဲ့ကြွေ အသီးမြေခ
ရိုးပြိုင်ထလျက် မလှဘ၀
အိုရွက်တွသော် ကျေးကမသီ
ဟိုဆီအဝေး စွန့် ခွာပြေးကြ
စုဝေးလာရောက် တစ်ထောက်ခိုနား
လူအများလည်း သူ့ နားမကပ်
လက်ရပ်မခေါ် အဖော်မပြု
ရှောင်ကွင်းမှုကြောင့်
သူ့ ဇတ်တစ်ခန်း ခွေညှိုးနွမ်းသည်
အလွမ်းရင်မှာ တင်သတည်း ။။။
*
သန်းခိုင်အောင်
.......
(ဝတီကြေးမုံဘလော့မှ)

Follow by Email

ဖုန်းနဲ့အလွယ်တကူဖတ်ဖို့>> Download APK

Categories